സിംഹക്കൂട്ടില്‍ അതിക്രമിച്ചു കടന്ന സ്ത്രീ രക്ഷപ്പെട്ടത് ഭാഗ്യം കൊണ്ട്. ന്യൂയോര്‍ക്കിലെ ബ്രോങ്ക്സ് മൃഗശാലയില്‍ ശനിയാഴ്ചയാണ് സംഭവം നടന്നത്. അതിക്രമിച്ച് കയറുക വഴി നിയമലംഘനമാണ് നടത്തിയതെന്നും ഈ പ്രവൃത്തി ഗുരുതരമായി പരിക്കേല്‍ക്കുന്നതിനോ ജീവഹാനിയ്ക്കോ കാരണമാകുമായിരുന്നുവെന്നും മൃഗശാല അധികൃതര്‍ അറിയിച്ചു. സുരക്ഷാവേലി കടന്നാണ് മൃഗശാലാ സന്ദര്‍ശനത്തിനെത്തിയ സ്ത്രീ ആഫ്രിക്കന്‍ സിംഹത്തിനരികിലെത്തിയത്. എന്നാല്‍ ഇവരാരാണെന്ന് അറിയില്ല.
മൃഗശാലയിലെത്തിയ മറ്റൊരു സന്ദര്‍ശകനാണ് ഇവരുടെ വീഡിയോ പകര്‍ത്തിയത്. വീഡിയോ സോഷ്യല്‍മീഡിയയില്‍ വന്‍ഹിറ്റാവുകയും ചെയ്തു. സിംഹത്തിനരികില്‍ യാതൊരു വിധത്തിലുള്ള ഭയമോ പരിഭ്രമമോ കൂടാതെയാണ് അവര്‍ ചെലവഴിച്ചതെന്ന് വീഡിയോ ദൃശ്യങ്ങളില്‍ വ്യക്തമാകും.നൃത്തം ചെയ്തും ഗോഷ്ടി കാണിച്ചും അവര്‍ പെരുമാറുന്നതും വീഡിയോയിലുണ്ട്. വേലിക്കെട്ടിന് പുറത്തുള്ളവര്‍ ഇവരെ പിന്തിരിപ്പിക്കാന്‍ ശ്രമിക്കുന്നതും വീഡിയോയില്‍ കാണാം. എങ്ങനെയാണ് ഇവര്‍ അകത്ത് കടന്നതെന്നോ എത്ര നേരം ഇവര്‍ അതിനുള്ളില്‍ ചെലവിട്ടു എന്നതിനെ കുറിച്ചോ അധികൃതര്‍ക്ക് യാതൊരു ധാരണയുമില്ല.
